cultura

01 Giugno 2009 | in categoria/e cultura

FONTANIN DE MEZA COSTA

Camminn-o fra i crinae do monte Porcîn
donde l'ombra do sô a disegna ciaei e scûi,
ödöando o profummo ch'o vegne
da-a valladda
in te 'na giornâ de stae insemme
a-e caèsse de'n vento amigo.
Me gïo a ammiâ l'anima do mondo
ch'o l'ha lasciòu e nûvie in çê
steize comme giancàia da sciugâ.
Tanta a l'è a sae pe-o cädo e a fadiga
pe' chi monta scin lasciû,
ma moae natûa a te porze sempre 'na man.
A meza costa gh'è 'na vëgia vivagna
ascösa in mezo a-i buschi,
donde da secoli sciorte n'aegua ciaea,
fresca e pùa
regallo da nostra bella taera.
Me son inzenoggiòu e faxendome
o segno ch'o distingue i crestien,
co-e moen a coppetta
o apprexòu ciancianin
quest'aegua, tanto a l'ëa freida.
Doppo tanti anni son ritornòu
in to maeximo posto,
ma quale disillûxion!
Stradde comode scì, e case pe' tutto o crinà
ma do fontanin
no gh'è restòu manco l'ombra.
Cäo fontanin, scibben pe' tanti anni
t'hae levòu a sae a oxelli, pëgoe
e a tutti quelli che arente a tì passavan,
oua in nomme do progresso
l'ommo o t'ha condannòu a moî,
e mì ho perso coscì n'amigo
in ta mae riçerca
in ta natûa de'n canto de paxe.
FONTANILE DI MEZZA COSTA
Cammino tra i crinali del monte Porcile
dove l'ombra del sole disegna chiari e scuri,
odorando il profumo che viene
dalla vallata
in una giornata d'estate, insieme
alle carezze di un vento amico.
Mi volto a guardare l'anima del mondo
che ha lasciato le nuvole in cielo
distese come biancheria da asciugare.
Molta è la sete per il caldo e la fatica
per chi sale sin lassù,
ma madre natura ti porge sempre una mano.
A mezza costa c'è una vecchia sorgente
nascosta in mezzo ai rovi,
dove da secoli esce un'acqua chiara,
fresca e pura
dono della nostra bella terra.
Mi sono inginocchiato e facendomi il segno che distingue i cristiani,
usando le mani come tazzina
ho apprezzato piano piano
quest'acqua, poichè era molto fredda.
Dopo molti anni sono ritornato
sul medesimo posto,
ma quale disillusione!
Strade comode sì e case per tutto il crinale
ma del fontanile
non c'è rimasta nemmeno l'ombra.
Caro fontanile, sebbene per molti anni hai tolto la sete ad uccelli, pecore
e a tutti quelli che vicino a te passavano,
adesso in nome del progresso
l'uomo ti ha condannato a morire,
ed io ho perduto così un'amico
nella mia ricerca
nella natura di un'angolo di pace